Bakeri i 35 år

H. Sætre Bakeri vart starta av Helmer Sætre  i 1938/39 i nybygd hus. I tillegg til å baka brød og kaker til eigen butikk, så leverte han bakervarer til m.a. butikkar i  Herøysund, Husnes, Kaldestad og Ølve. I 1947 vart huset utvida, og tidleg på 1960-talen vart og butikken utvida slik at det vart plass til eit større vareutval. Under oppbygginga av aluminiumsverket på Husnes leverte H. Sætre Bakeri brød til kantina som hadde ansvaret for matserveringa til tilreisande anleggsfolk. Mange ungdommar har gått i bakarlære hos Helmer Sætre.  Bakeriet og butikken vart lagt ned i 1973. Bilete syner huset i 1939. Fotoeigarar: Tor Henrik Sætre og Harald Sætre.

Her er eit bilete av Uskedal sentrum, teke i 1938 el. 1939 av Helmer Sætre.  Bensinpumpa til høgre tilhøyrde Ivar Bringedal, som hadde landhandel like over vegen. 'Med spesialitet i fetevare, fisk, fiskemat, pølesmakeri, røkeri, samt alt i grønnsaker og poteter etc. Bensinstasjon. Fiskebilrute for Kvinnherad og omegn. Kjøp og salg av skinn og huder.' som det står i Det Norske Næringsliv, Hordaland fylkesleksikon. Fotoeigar: Tor Henrik Sætre og Harald Sætre. -Nokon som kjenner att personane på biletet, så ta kontakt her.  truleg er det tilreisande (frå Rosendal/Løfallstrand ?) som har vore og sett på det nye huset til Helmer Sætre som stod ferdig på denne tida.

Dette bilete kjem frå H. Sætre Bakeri. Her ser vi Helmer Sætre (til høgre) og Leif Olderkjær i fullt bakarutstyr. Leif Olderkjær ( gift med Sylvi Myklebust frå Sanden) starta seinare opp eige bakeri på Sunde. Bilete er truleg frå 1939 eller rett etter krigen. Bileteigarar: Tor Henrik Sætre og Harald Sætre.

Her ser ein Helmer Sætre, frå H. Sætre Bakeri, framfor den nye varebilen som han brukte å kjøre ut brød til butikkar i nabobygdene. Dette bilete er truleg teke i desember 1939, (jf 'juleutstillinga' i butikkvindauga) Under trefningane mellom Heimevernet og tyske styrkar i april 1940, nytta han bilen til å evakuera folk opp i dalen. For å unngå å bli skyteskive for tyskarane, måla han raude krossen på sidene og på taket.

Bilde av to læregutar hos Helmer Sætre tidleg på 1950-talet.  Erling Eik frå Uskedalen (til venstre) og Trygve Guntveit frå Herdla. Fotoeigarar: Tor Henrik Sætre og Harald Sætre.