Den første i Uskedalen…

Når kom den første bil, den første traktor og det første flyet til Uskedalen? Det kan biletsamlinga til Uskedal Ungdomslag hjelpa oss med.

Den første bilen i Uskedalen kom truleg i 1929 og Kindt tok dette biletet, på ein tur til Utåker 19. september 1929. Bilen var ein Chevrolet 1927-modell og mannen bak rattet er truleg Fritjof Sunde. Bak sit fru Kindt og dottera Edit. Sunde nytta bilen mellom anna som drosje.

Den første traktoren kom til Uskedalen i 1951 og var eigd av Knut Døssland, Andreas T. Haugland og Torgeir Musland. Guten på traktoren er Ivar Kåre Døssland.

Bjørne Myklebust tok biletet av det første flyet som kom til Uskedalen i 1931. Det landa i Beinavikjo.Flyet er av typen Hansa Brandenburg W.33. Eit tysk rekognoseringsfly, konstruert i 1917. Desse flya vart nytta av Marinens Flyvevesen her i Norge. Flya vart lisensproduserte i marinen sin flyfabrikk i Horten. I alt 24 fly av denne typen vart produsert, i tillegg kom 6 fly frå Hærens Flyvevesen.Dei fleste av flya var utstyrte med ein 260 hk Mercedes motor. Vengespenn 15,7 meter og lengde 11 meter. Maks fart var 160 km/t. Det første flyet gjekk på vengene i september 1921 og dei siste flya vart stilt i reserve i 1933.