Sæberg nemner spesielt Torgeir J. Musland, som var leiar i feavlslaget og ein dugande rettleiar. I 1897 selde han kua Blomma til Lars S. Tjelle i Skånevik. 28. mars dette året fødde Blomma ein oksekalv. To år gamal, i mars 1900, vart den raude og kollete ungoksen seld til C. Lund på Husnes og i august same året vidare til Uskedalen Feavlslag. Oksen heitte Sverre 1042 og salssummen var svimlande 625 kroner.
Oksen fekk første premie på tre utstillingar og kom på ein heilt suveren måte til å setja preget på Vestlands Raukollfe.. På tre år snudde han om heile avlen av storfe i Sunnhordland og Kvinnherad til raudkoller.
Han vart ein matador med 39 stambokførde søner og 21 døtrer. Han fekk mange annenpremiesøner etter seg og dessutan fine døtrer med høg produksjon for den tida. | 
